डाक्टर चैतन्य अधिकारी नेपाली साहित्यको कविता लेखनमा एक स्थापित नाम हो । उहाँको कविताहरुले प्रेम, लोकतन्त्र , राजनीति र सामाजिक मुद्दालाई दह्रो रुपमा उठान गरिरहेको हुन्छ । प्रस्तुत छ साताको तीन कविता ।
ढुुङ्गा
दुखले सोध्यो
उम्किन पाउदैनौ
ढुङ्गा राख्छु नै
तिम्रो मुटुमाथि
तर कस्तो ढुङ्गा राखुँ ?
मेरो मुटु पनि
सानो कहाँ थियो र ?
मैले हास्दै भने केही छैन
बाक्लो ढुङ्गा राख
चाक्लो ढुङ्गा राख
ताकि कोही
मस्तले त्यहाँ बस्न सकोस्
निदाउन सकोस्
मन लागे
त्यसैमा टेकेर उभियोस्
र अन्ततोगत्वा
म धर्ती भएर सबै बिर्सन सकुं !
कविलाई
साँच्चै हो
तिमी कोहीभन्दा कम होइनौ
तर अहिले होशमा छैनौ
रातमा
हल्ला मच्चाउंँदै
तिमी टोल छिरेपछि
एसईईका बिद्यार्थीहरूले
झ्याल खोलेर
सडकतिर हेरेका छन्
पैतालामा भुईंचालो बोकेर
हरेकजसो दिन
तिमी आफ्नो घर छिरेका किस्सा
बा- आमाहरूलाई भने नौलो रहेनछ
मेरी बास्सै,
ए कवि !
तिमी त ह्वास्सै गनाएका छौ !
खराब सपनाको आदत
म ब्युझें
तर्सेर फेरि
मेरै खराब सपनाको कारण
दिएको रहेछु
मैले आफ्नो असाध्यै सुन्दर चीज
अत्यन्तै उदण्ड प्राणीहरूको हातमा
त्यसलाई क्षतविक्षत पारेर
‘यो बेकारको रहेछ’ भन्दै
तिनीहरू टक्टकिन खोजेपछि
म आत्तिएको रहेछु
मसंग कुनै शब्द नै छैनन्
भन्नलाई,
रिसाउनुपर्ने
मनग्य कारण हुंदाहुंदै पनि
रिसाउन सकिरहेको छैन
‘अब म तिमीहरूको संगत गर्नेछैन’
मैले मनमनै यत्ति भनेंँ
म कुंद्नेछु
मेरै पसिनाले
अर्को झनै सुन्दर चीज
त्यो म तिमीहरू कसैलाई दिनेछैन
म बदल्न चाहन्छु
पटक पटक
खराब सपनाहरू देख्ने
आफ्नै आदतलाई ।
