काठमाडौं । नेपाली काङ्ग्रेसले ४५औं राष्ट्रिय मेलमिलाप दिवस आज विभिन्न कार्यक्रम गरि मनाउँदैछ । २०३३ साल पुस १६ गते नेपाली काङ्ग्रेसका संस्थापक वीपी कोइरालासहितका नेताहरु आठ वर्षे निर्वासित जीवन बिताएर यसै दिन स्वदेश फर्केको सम्झनामा राष्ट्रिय मेलमिलाप दिवस मनाइने गरिएको छ ।
नेपाली काङ्ग्रेसले यो वर्षको दिवसलाई सरकारले गरेको गलत कदमलाई लिएर राष्ट्रिय एकताको रुपमा मनाउने जनाएको छ । सरकारको अलोकतान्त्रिक कदमको विरोधका लागि जनतालाई एकत्रित गर्न यो वर्षको मेलमिलाप दिवस केन्द्रीत हुने काङ्ग्रेसको भनाइ छ ।
काङ्ग्रेसले २०३३ साल पुस १६ गते देखि हरेक वर्ष सोही दिन राष्ट्रिय एकता तथा मेलमिलाप दिवस मनाउँदै आएको छ । यो वर्ष मेलमिलाप दिवसको कार्यक्रम ७७ वटै जिल्लामा मनाउने निर्णय काङ्ग्रेसले गरेको छ ।
२०१७ सालमा तत्कालीन राजा महेन्द्रले जननिर्वाचित प्रधानमन्त्री वीपी कोइरालाको सरकार बर्खास्त गर्दै निर्दलीय पञ्चायती ब्यवस्था शुरु गरेपछि कोइरालासहितका नेतालाई ८ वर्ष जेल पठाइएको थियो । त्यसपछि २०२५ सालमा वीपीसहितका काङ्ग्रेस नेता भारत प्रवास गएका थिए ।
